Əməkdar incəsənət xadimi, tanınmış bəstəkar Cavanşir Quliyev verdiyi müsahibədə Azərbaycanın “Avroviziya” mahnı müsabiqəsindəki iştirakını və son illərdəki nəticələrini şərh edib.
Bəstəkar son illərdə Azərbaycan təmsilçilərinin final mərhələsinə adlaya bilməməsini sadəcə musiqi faktorları ilə deyil, birbaşa olaraq Avropadakı siyasi konyuktura və anti-Azərbaycan meylləri ilə əlaqələndirib. O vurğulayıb ki, Azərbaycanın Qarabağda əldə etdiyi tarixi və hərbi nailiyyətlər Qərb dövlətləri və onların media qurumları tərəfindən böyük qısqanclıqla qarşılanır və bu qərəzli yanaşma Avropa mətbuatında mütəmadi olaraq yayımlanan yazılar vasitəsilə sadə vətəndaşların beyninə yeridilir.
Nəticədə, məsələnin kökündən və həqiqətlərdən bixəbər olan sıravi avropalı tamaşaçı Azərbaycana qarşı mənfi rəy formalaşdırır ki, bu da müsabiqə zamanı səsvermə faizlərinə və ümumi nəticələrə birbaşa, neqativ şəkildə təsir göstərir.
Siyasi təzyiqlərlə yanaşı, Cavanşir Quliyev Azərbaycanın bu yarışmada iştirakının mənəvi və mədəni tərəflərini də sərt dillə tənqid edərək, ölkəmizin bu platformadan tamamilə çəkilməli olduğunu müdafiə edib.
Bəstəkarın fikrincə, “Avroviziya”nın həm əsas iştirakçı kontingenti, həm də daimi dinləyici kütləsi qeyri-standart və milli dəyərlərə zidd olan insanlardan ibarətdir və bu səbəbdən yarışmanın diktə etdiyi submədəniyyət Azərbaycan cəmiyyətinin mentalitetinə, mənəvi əsaslarına kökündən yad bir elementdir. Həm bu mənəvi uyğunsuzluğu, həm də səsvermədəki aşkar qeyri-obyektivliyi əsas gətirən bəstəkar, Azərbaycanın hər il bu müsabiqə üçün böyük resurslar xərcləməsinin mənasız olduğunu qeyd edib.
Məsələnin sırf musiqi və sənət tərəfinə toxunan Cavanşir Quliyev, Azərbaycanın müsabiqə strategiyasının tamamilə yanlış təməllər üzərində qurulduğunu bildirib və daxili təşkilatçıların fəaliyyətini kəskin tənqid atəşinə tutub. O, yarışmanı idarə edən və layihələrə rəhbərlik edən yerli məsul şəxslərin adlarını bilmədiyini, lakin onların yeganə məqsədinin kor-koranə şəkildə Avropaya bənzəmək, qərb üslubunu kopyalamaq olduğunu vurğulayıb. Bəstəkar xatırladıb ki, heç bir kopya heç vaxt orijinaldan daha yaxşı və cəlbedici ola bilməz.
Hindistan kinematoqrafiyasını və musiqi sənayesini nümunə göstərən bəstəkar, onların öz milli musiqilərini dünyaya necə qəbul etdirdiklərini diqqətə çatdırıb və Azərbaycanın da sonuncu yerə çıxmaq baha başa gəlsə belə, öz milli musiqi üslubu sənətini, öz mental çalarlarını təbliğ etməli olduğunu müdafiə edib.
Sonda bəstəkar Azərbaycanın 2011-ci ildə qazandığı tarixi qələbənin uzunmüddətli perspektivdə ölkə mədəniyyətinə və musiqisinə heç bir real fayda vermədiyini iddia edib. Cavanşir Quliyev o vaxt birinci olan gənc ifaçıların bu qədər vaxt keçməsinə baxmayaraq bu gün ciddi, fundamental iz qoya bilmədiklərini, böyük səhnələrdən uzaq düşərək sadəcə restoranlarda və kiçik məkanlarda gündəlik pul qazanmaqla məşğul olduqlarını acı reallıq kimi önə çəkərək, bu cür müvəqqəti və süni şöhrət yarışlarının milli musiqi sənətinin inkişafına heç bir töhfə vermədiyini vurğulayıb.
Mənbə: Moderator.az
