Tanınmış bəstəkar, Əməkdar artist Gövhər Həsənzadə “Daha Aydın” verilişində Azərbaycanın “Avroviziya” mahnı müsabiqəsindəki tarixi debütü ilə bağlı maraqlı xatirələrini bölüşüb.
Bəstəkar 2008-ci ildə Azərbaycanı təmsil edən Samir Cavadzadə və Elnur Hüseynovun ifa etdiyi “Day After Day” mahnısının hazırlıq prosesinin olduqca məsuliyyətli, gərgin, lakin bir o qədər də qürurverici olduğunu bildirib.
Gövhər Həsənzadə qeyd edib ki, ölkəmizin ilk dəfə belə böyük beynəlxalq musiqi arenasına çıxması yaradıcı heyət üçün böyük bir sınaq idi. Mahnının məhz duet formatında hazırlanması, ifaçıların seçilməsi və səhnə performansı üzərində uzun müddətli, ciddi iş aparılıb. O, mahnının bəstələnməsi zamanı Azərbaycan musiqisinin ruhunu və özünəməxsusluğunu qoruyub saxlamaqla yanaşı, müsabiqənin beynəlxalq standartlarına uyğunlaşdırmağın prioritet olduğunu vurğulayıb.
Bəstəkar çıxışında milli musiqi ənənələrimizin müasir aranjimanlarla sintezinin əhəmiyyətinə xüsusi diqqət yetirib. Onun sözlərinə görə, uğurun açarı – kənar dəstəyə və ya stereotiplərə boyun əymədən, öz milli köklərimizə sadiq qalaraq, yüksək peşəkarlıqla beynəlxalq platformalarda çıxış etməkdir.
Gövhər Həsənzadə Azərbaycanın mədəni potensialının və yaradıcı gücünün dünyada özünə layiqli yer tutmaq üçün yetərli olduğunu, milli kimliyimizin qorunmasının isə musiqi brendimizin tanıdılmasında ən vacib şərt olduğunu qeyd edib.
