“The New York Times”ın apardığı araşdırma İsrailin “Avroviziya” mahnı müsabiqəsində səsvermə nəticələrinə təsir göstərmək və ölkənin beynəlxalq imicini gücləndirmək məqsədilə illərdir gizli kampaniya yürütdüyünü üzə çıxarıb.
Əldə edilən sənədlər və 50-dən çox şəxslə aparılan müsahibələr göstərir ki, Baş nazir Benyamin Netanyahu hökuməti Qəzzadakı hadisələrə görə yaranan beynəlxalq qınaq fonunda dəstək toplamaq üçün müsabiqədən strateji bir “yumşaq güc” aləti kimi istifadə edib.
Hökumətlərin səsvermə prosesinə müdaxiləsi qəti qadağan olsa da, araşdırma İsrailin bu fəaliyyətlərinin ötənilki yarışmanın nəticələrinə asanlıqla təsir edə bildiyini iddia edir.
Bundan əlavə, İsrailin builki müsabiqədə qalmasını təmin etmək üçün göstərilən güclü diplomatik təzyiqlər “Avroviziya”nın daxili birliyini sarsıdaraq müsabiqəni ciddi bir böhran və parçalanma həddinə çatdırıb.
