AYB Avroviziya Mahnı Müsabiqəsinin 70 illiyini qeyd edərkən, müsabiqənin ən böyük sirrlərindən birini həll etmək üçün diqqətini Avroviziya icmasının ən mərkəzinə — fanlara yönəldir.
Qlobal çağırış çərçivəsində AYB rəsmi olaraq iki tarixi buraxılışdan itkin düşmüş görüntüləri bərpa etmək üçün dünya miqyasında axtarışa başlayıb: 1956-cı ildə keçirilən ilk müsabiqə və 1964-cü il buraxılışı. Onilliklər boyu arxivləşdirməyə baxmayaraq, bu şouların tam yazıları bu gün mövcud deyil — yalnız fraqmentlər, audio materiallar və xatirələr qalıb.
İndi isə axtarış başlayır. Şəxsi kolleksiyalardan və yayımçı arxivlərindən tutmuş unudulmuş film lentlərinə və çardaq tapıntılarına qədər, AYB əlində ən kiçik material belə olan hər kəsi — tam yazılar, qismən videolar və ya fotoşəkillər — irəli çıxmağa və Avroviziya tarixinin itirilmiş səhifələrini yenidən qurmağa kömək etməyə dəvət edir.
Bu təşəbbüs müsabiqənin 70 illik yubiley tədbirlərinin bir hissəsidir və təkcə onun dünyanın ən böyük canlı musiqi tədbirinə çevrilməsini deyil, həm də irsinin gələcək nəsillər üçün qorunmasının vacibliyini vurğulayır. Son dövrlərdə “itirilmiş” anların yenidən üzə çıxması artıq sübut edir ki, hələ də kəşf olunacaq çoxlu gizli incilər mövcuddur.
“Qlobal xəzinə ovu” kimi təsvir olunan bu təşəbbüs Avroviziya ruhunu yenidən bir araya gətirir — fanları, yayımçıları və arxivçiləri dünyanın hər yerindən birləşdirərək televiziya tarixinin ən ikonik tədbirlərindən birinin hekayəsini tamamlamayı hədəfləyir.
Əlində uyğun material ola biləcəyini düşünən hər kəsdən xahiş olunur ki, mümkün qədər ətraflı məlumatla AYB ilə press@eurovision.com vasitəsilə əlaqə saxlasın.
